ମାଲାପୁରମ୍: କେରଳର ଏକ କୋର୍ଟ ଜଣେ ପିତାଙ୍କୁ ତାଙ୍କ ନାବାଳିକା ସାବତ ଝିଅଙ୍କ ୁ ବଳାତ୍କାର କରିଥିବା ଅଭିଯୋଗରେ ଦୋଷୀ ସାବ୍ୟସ୍ତ କରିଛନ୍ତି । ତାଙ୍କୁ ୧୪୧ ବର୍ଷ ଜେଲ୍ ଦଣ୍ଡାଦେଶରେ ଦଣ୍ଡିତ କରିଛନ୍ତି। ଜିଲ୍ଲାର ମଞ୍ଜରୀ ସହରର ଫାଷ୍ଟ ଟ୍ରାକ୍ ସ୍ପେଶାଲ କୋର୍ଟର ଜଜ୍ ଅଶରଫ୍ ଏମ୍ ଦୋଷୀଙ୍କୁ ମୋଟ ୧୪୧ ବର୍ଷ କାରାଦଣ୍ଡାଦେଶ ଶୁଣାଇଛନ୍ତି।
କୋର୍ଟଙ୍କ ନଭେମ୍ବର ୨୯ର ରାୟ ଅନୁଯାୟୀ, ଦୋଷୀଙ୍କୁ ମୋଟ ୪୦ ବର୍ଷ କାରାଦଣ୍ଡ ଭୋଗିବାକୁ ପଡିବ। କାରଣ ଏହା ତାଙ୍କୁ ପ୍ରଦାନ କରାଯାଇଥିବା ସର୍ବୋଚ୍ଚ ସମୟ ଅଟେ। ଏଥିରେ କୁହାଯାଇଛି ଯେ ବିଭିନ୍ନ ବ୍ୟବସ୍ଥା ଅନୁଯାୟୀ ଦିଆଯାଇଥିବା ବିଭିନ୍ନ ଦଣ୍ଡ ଏକାଠି ଚାଲିବ। କୋର୍ଟ ଦୋଷୀକୁ ୭.୮୫ ଲକ୍ଷ ଟଙ୍କା ଜରିମାନା କରିଛନ୍ତି ଏବଂ ପୀଡିତାଙ୍କୁ କ୍ଷତିପୂରଣ ଦେବାକୁ ନିର୍ଦ୍ଦେଶ ଦେଇଛନ୍ତି। ଏହି ମାମଲା ସହ ଜଡିତ ଜଣେ ପୋଲିସ ଅଧିକାରୀ କହିଛନ୍ତି ଯେ ଅଭିଯୁକ୍ତ ଏବଂ ପୀଡିତା ତାମିଲନାଡୁର ମୂଳ ବାସିନ୍ଦା। ସେ କହିଛନ୍ତି ଯେ ସାବତ ପିତା ୨୦୧୭ରୁ ପୀଡିତାଙ୍କ ସହିତ ବଳାତ୍କାର କରି ଆସୁଥିଲେ। ଶେଷରେ ପୀଡିତା ଜଣକ ତାଙ୍କ ବନ୍ଧୁଙ୍କ ପରାମର୍ଶରେ ଏହି ଘଟଣା ବିଷୟରେ ତାଙ୍କ ମା’ଙ୍କୁ କହିଥିଲେ। ପରେ ସେ ଏନେଇ ପୋଲିସ ନିକଟରେ ଅଭିଯୋଗ କରିଥିଲେ।
